تحـــرير

أنا من طمي طين نيلك

مغروس بقالي سنين

والظلم ناشع فيا

ع الجنبين

والمية لما بتروي

بتروي فيا أنين

وبتدبل

زهرتي

وبتموت

والشمس اللي خالقها

ربنا عشاني

نار جوا جتتي

بتسري و تفوت

ويفوت جوايا حلم

بكرة إن اقدر اشد عودي

وتعودي

بضحكتك ليا

أنا دمعي لأني متكتف

ف ارض الطين

الطمي ده طميك

والمية دي تروي

كل عطشان

إيه اللي لوث ميتك

وجابلنا السرطان

إيه اللي سمم

ضحكتك

وبقت ضحكة صفرة

إيه اللي زود غربتك

ورماكي ف التوهان

يا مصر هنزل

صدري عاري

للرصاص الحي

لو هموت علشان

أشوف الضحكة

والله لرايح لأجل أموت

ما ني جاي

إلا لما اجيبلك

حق ضايع

أو أموت

وأفضل ف قلبك حي

يا ميدان التحرير

يا كل شبر فيك

مروي بدمي

ودم غيري

والأرض رجعت خصبة تاني

الطمي طميك

والنيل ده نيلك

والدم دمك

وكلنا اتحملنا همك

وخايف عليكي م اللي جاي

.................