أنا مش جدع

أنا مش جدع ولا مبتدع

ولا يوم عرفت اضرب ودع

أنا كل حلتي أقول وابوح

والصمت مني كلام فصيح

من غير فضايح أو مديح

أنا نلت حلم وكان محال

حريتي فـ ثورة رجال

راحت ما بين حق وضلال

واللي يعز عليه جد

الذئب ياكل فـ الولد

يقتل ويتهم الأسد

مين اللي خان واللي فتن

نخرج من المحنة لمحن

والدم غرقان بالوطن

نار ولعت بين الولاد

من جاني بايع فـ الحصاد

والسعر عالي فـ المزاد

طب ليه بننسج فـ الظنون

يا مصري مش خايف تهون

سامح عشان ربك يصون

يا رب دا حال البلد

اللي اتقتل واللي اتولد

الطف مفيش غيرك سند